ନବରଙ୍ଗପୁର୨୩/୫: ନବରଙ୍ଗପୁର ବ୍ଳକ ଚଟ୍ଟହାଣ୍ଡି ଠାରେ ବୃଦ୍ଧାଶ୍ରମ ନିର୍ମାଣର ଅବଧି ବର୍ଷେ ବିତିଗଲାଣି । କିନ୍ତୁ ଏବେ ଏହା ଅଧପନ୍ତରିଆରେ ଅବସ୍ଥାରେ ପଡି ରହିଛି। ଆଜି ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ପରିଦର୍ଶନ କରି ବିଭାଗୀୟ ଅଧିକାରୀଙ୍କୁ ନିର୍ମାଣ ସଂପୂର୍ଣ୍ଣ କରିବାକୁ ତାଗିଦ୍ କରିଛନ୍ତି। ସେଭଳି ସଂପୃକ୍ତ ସଚିବଙ୍କୁ ଫୋନ୍ରେ ଆଲୋଚନା କରି ବୃଦ୍ଧାଶ୍ରମ ନିର୍ମାଣ ସଂପୂର୍ଣ୍ଣ କରିବା ପାଇଁ ଆବଶ୍ୟକ ଆନୁଷଙ୍ଗିକ ବ୍ୟବସ୍ଥା ପାନୀୟଜଳ,ବିଦ୍ୟୁତକରଣ, ଅଗ୍ନି ନିରାପତ୍ତା ଓ କର୍ମଚାରୀ କ୍ୱାର୍ଟର ନିର୍ମାଣ କାର୍ଯ୍ୟ ସାରି ୨ ମାସ ମଧ୍ୟରେ ବୃଦ୍ଧାଶ୍ରମ କାର୍ଯ୍ୟକ୍ଷମ କରିବାକୁ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ବିଭାଗୀୟ ଅଧିକାରୀଙ୍କୁ ନିର୍ଦେଶ ଦେଇଛନ୍ତି। ମନ୍ତ୍ରୀଙ୍କ ଏହି ଗସ୍ତରେ ଆଇଟିଡିଏ ପ୍ରକଳ୍ପ ପ୍ରଶାସକ ରାଜୀବ କୁମାର ସାହୁ, ଜିଲ୍ଲାମଙ୍ଗଳ ଅଧିକାରୀ ରବୀନ୍ଦ୍ର ପଲ୍କା, ବିଭାଗୀୟ ଯନ୍ତ୍ରୀ, ମାନସ ରଞ୍ଜନ ଦାସ, ଦେବଦାସ ମହାଙ୍କୁଡ,ପିଣ୍ଟୁ ମିଶ୍ର,ଠିକାଦାର ଜଗନ୍ନାଥ ମହାପାତ୍ର, ମିଳୁପଣ୍ଡା ପ୍ରମୁଖ ଉପସ୍ଥିତ ଥିଲେ।
ସୂଚନାଯୋଗ୍ୟ ଯେ, ଚଟ୍ଟାହାଣ୍ଡି ଠାରେ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗ ପକ୍ଷରୁ ପ୍ରାୟ ୨୫ ଏକର ଜମିରେ ୨୯ କୋଟି ବ୍ୟୟରେ ୪୦୦ ଅନ୍ତେବାସୀଙ୍କୁ ମାଗଣାରେ ରହିବା, ଖାଇବା, ମାଗଣା ଚିକିତ୍ସା ବ୍ୟବସ୍ଥା କରିବା ପାଇଁ ବିରାଟ ଭିତ୍ତିଭୂମୀରେ ଏକ ବୃଦ୍ଧାଶ୍ରମ ନିର୍ମାଣ ଚାଲିଛି । କୋଠାର ନିର୍ମାଣ କାମ ଶେଷ ହୋଇଥିବା ବେଳେ ଆନୁଷଙ୍ଗିକ ବ୍ୟବସ୍ଥା ପାନୀୟ ଜଳ, ବିଦ୍ୟୁତକରଣ, ଅଗ୍ନି ନିରାପତ୍ତା ଓ କର୍ମଚାରୀ କ୍ୱାଟର୍ସ ନିର୍ମାଣ ହୋଇପାରିନାହିଁ । ଏହି ପ୍ରକଳ୍ପ କାର୍ଯ୍ୟ ୨୦୨୪ରେ କାର୍ଯ୍ୟ ଶେଷ ହେବାର ଥିଲା। କିନ୍ତୁ ବିଭାଗର ଅପାରଗତା ଯୋଗୁ ନିର୍ମାଣର ଅବଧି ମଧ୍ୟରେ ସଂପୂର୍ଣ୍ଣ ହୋଇନଥିବାରୁ ମନ୍ତ୍ରୀ ବିଭାଗୀୟ ଅଧିକାରୀଙ୍କ ଉପରେ ଅସନ୍ତୋଷ ପ୍ରକାଶ କରିଥିଲେ । ଯୁଦ୍ଧକାଳନୀ ମଧ୍ୟରେ କାର୍ଯ୍ୟ ସଂପୂର୍ଣ୍ଣ କରି ବୃଦ୍ଧାଶ୍ରମ କାର୍ଯ୍ୟକ୍ଷମ କରିବାକୁ ନିର୍ଦ୍ଦେଶ ଦେଇଛନ୍ତି।
